ചെമ്പേരി: വയനാട് ജില്ലയിലെ മാനന്തവാടിയിൽ നിന്ന് ചെമ്പേരിയിലേക്ക് സർവീസ് ആരംഭിച്ച കെഎസ്ആർടിസി ബസിന് ചെമ്പേരി ടൗണിൽ പൗരാവലിയുടെ നേതൃത്വത്തിൽ സ്വീകരണം നൽകി. ദിവസേന രാവിലെ 5.30ന് ചെമ്പേരിയിൽ നിന്ന് പുറപ്പെട്ട് പയ്യാവൂർ, ഇരിട്ടി, പേരാവൂർ, കൊട്ടിയൂർ വഴി 8.30 ന് മാനന്തവാടിയിലെത്തിച്ചേരും. വൈകുന്നേരം 6.30 ന് മാനന്തവാടിയിൽ നിന്ന് പുറപ്പെട്ട് രാത്രി 9.30 ന് ചെമ്പേരിയിൽ സർവീസ് പൂർത്തിയാക്കും.
നിലവിൽ മാനന്തവാടിയിൽ നിന്ന് പയ്യാവൂർ വരെ ഓടിയിരുന്ന ഈ ബസ് ചെമ്പേരിയിലേക്ക് സർവീസ് നീട്ടണമെന്നാവശ്യപ്പെട്ട് ഏരുവേശി ഗ്രാമപഞ്ചായത്ത് പ്രസിഡന്റ് ടെസി ഇമ്മാനുവൽ ജില്ലാ ട്രാൻസ്പോർട്ട് ഓഫീസർക്ക് നിവേദനം നൽകിയിരുന്നു.