ട്വന്റി20 ക്രിക്കറ്റ് ലോകകപ്പിലെ സൂപ്പര്‍ എട്ട് മത്സരങ്ങള്‍ക്ക് ഇന്ന് തുടക്കം. ദക്ഷിണാഫ്രിക്കയും യു.എസും തമ്മില്‍ വെസ്റ്റിന്‍ഡീസിലെ നോര്‍ത്ത് സൗണ്ടിലാണ് ആദ്യ കളി.
നാളെ ബ്രിഡ്ജ്ടൗണില്‍ അഫ്ഗാനിസ്താനെ ഇന്ത്യ നേരിടും. ശനിയാഴ്ച ബംഗ്ലാദേശും തിങ്കളാഴ്ച ആസ്‌ട്രേലിയയുമാണ് രോഹിത് ശര്‍മക്കും സംഘത്തിനും എതിരാളികള്‍. 4 ടീമുകള്‍ അടങ്ങുന്ന രണ്ട് ഗ്രൂപ്പാണ് സൂപ്പര്‍ എട്ടിലുള്ളത്. ഓരോ ഗ്രൂപ്പിലെയും ടീമുകള്‍ പരസ്പരം ഏറ്റുമുട്ടി ആദ്യ രണ്ട് സ്ഥാനക്കാര്‍ സെമി ഫൈനലില്‍ കടക്കും.
ഇന്ത്യയും ആസ്‌ട്രേലിയയും ബംഗ്ലാദേശും അഫ്ഗാനിസ്താനുമാണ് ഗ്രൂപ് ഒന്നില്‍. ഇംഗ്ലണ്ടും ദക്ഷിണാഫ്രിക്കയും യു.എസും വെസ്റ്റിന്‍ഡീസും രണ്ടിലും. ഗ്രൂപ് എയിലെ ആദ്യ രണ്ട് സ്ഥാനക്കാരാണ് ഇന്ത്യയും യു.എസും. ബിയില്‍ നിന്ന് ഓസീസും ഇംഗ്ലണ്ടും സിയില്‍ നിന്ന് വിന്‍ഡീസും അഫ്ഗാനും ഡിയില്‍നിന്ന് ദക്ഷിണാഫ്രിക്കയും ബംഗ്ലാദേശും യഥാക്രമം കടന്നു. പാകിസ്താന്‍, ന്യൂസിലന്‍ഡ്, ശ്രീലങ്ക തുടങ്ങിയ കരുത്തര്‍ ഇക്കുറി ഗ്രൂപ് റൗണ്ടില്‍ത്തന്നെ പുറത്തായി.