ന്യൂഡല്ഹി: യൂറോപ്പിലൂം തെക്ക്-കിഴക്കന് ഏഷ്യന് രാജ്യങ്ങളിലും ഉള്പ്പെടെ കോവിഡ് കേസുകള് കുതിച്ചുയരുന്ന പശ്ചാത്തലത്തില് അതീവ ജാഗ്രത തുടരാന് കേന്ദ്രം സംസ്ഥാനങ്ങള്ക്ക് നിര്ദേശം നല്കി. കോവിഡ് സ്ഥിതിഗതികള് വിലയിരുത്താനായി ആരോഗ്യമന്ത്രി മന്സൂഖ് മാണ്ഡവ്യയുടെ അധ്യക്ഷതയില് ചേര്ന്ന ഉന്നതതല യോഗത്തിലാണ് നിര്ദേശം. ചൈനയിലും തെക്ക് കിഴക്കന് ഏഷ്യന് രാജ്യങ്ങളായ ദക്ഷിണ കൊറിയ,സിംഗപുര് എന്നിവിടങ്ങളിലുമാണ് കോവിഡ് കേസുകള് ഉയരുന്നത്. ചൈനയില് കഴിഞ്ഞദിവസം പ്രതിദിന കോവിഡ് രോഗികള് 5000 കടന്നു. ബുധനാഴ്ച 3290 പേര്ക്കാണ് പുതുതായി രോഗം ബാധിച്ചത്. ഒമിക്രോണിന്റെ ഉപവകഭേദമാണ് മുഖ്യമായി പടര്ന്നുപിടിക്കുന്നത്. ചൈനയില് വിവിധ നഗരങ്ങളില് നിയന്ത്രണങ്ങള് കടുപ്പിച്ചിരിക്കുകയാണ്. ഈ പശ്ചാത്തലത്തിലാണ് ഇന്ത്യയിലും അതീവ ജാഗ്രത തുടരാന് കേന്ദ്രസര്ക്കാര് നിര്ദേശിച്ചത്. സാംപിളുകള് ജനിതക ശ്രേണീകരണ പരിശോധനയ്ക്ക് വിധേയമാക്കുന്നതില് വിട്ടുവീഴ്ച പാടില്ല. കോവിഡ് ക്ലസ്റ്റുകള് കണ്ടെത്തി നിരീക്ഷണം ശക്തമാക്കാനും കേന്ദ്രം നിര്ദേശിച്ചു.