കണ്ണൂർ: ഓടികൊണ്ടിരിക്കുന്ന ബസിനുള്ളിൽ നിന്നുംപുക ഉയർന്നത് യാത്രക്കാരെ പരിഭ്രാന്തിയിലാക്കി. ബസ് ജീവനക്കാരുടെ അവസരോചിതമായ ഇടപെടൽ മൂലം വൻ അപകടമാണ് ഒഴിവായത്. ഇന്നലെ രാവിലെ10.15 ഓടെ കണ്ണൂർ പ്രഭാത് ജംഗ്ഷന് സമീപമാണ് സംഭവം. ബോണറ്റിൽ നിന്ന് പുകവരുന്നത് കണ്ട് ബസ്‌ഡ്രൈവർ അഖിൽ യാത്രക്കാരെ പെട്ടെന്ന് തന്നെ ഇറക്കുകയായിരുന്നു. തുടർന്ന് ബസ് ജീവനക്കാർ ബസ് തൊട്ടടുത്തുള്ള അഗ്നി രക്ഷാനിലയത്തിന്‍റെ മുന്നിലെത്തിച്ച് വിവരം പറയുകയും സേനാ ജീവനക്കാർ ഫയർ എക്സ്റ്റിൻഗ്യുഷർ ഉപയോഗിച്ചും വെള്ളം പമ്പ് ചെയ്തും ബോണറ്റിനുള്ളിൽ നിന്നുള്ള ചെറിയ തോതിലുള്ള തീ നിയന്ത്രണ വിധേയമാക്കുകയും ചെയ്തു.
ബോണറ്റിലെ കേബിൾ കത്തിനശിച്ച നിലയിലാണ്. കൂടാളിയിൽ നിന്നും കണ്ണൂർ ആശുപത്രി റൂട്ടിൽ സർവീസ് നടത്തുന്ന കെ എൽ 59 ഡി 1011 നമ്പർ കുറ്റ്യാട്ടൂർ സ്വദേശി പി.പി. സരിത്തിന്‍റെ ഉടമസ്ഥതയിലുള്ള ബസിനാണ് തീ പിടിച്ചത്.