തിരുവനന്തപുരം: എസ്.എസ്.എല്‍.സി പരീക്ഷ ഡ്യൂട്ടിയെടുക്കുന്ന സ്കൂളില്‍ തന്നെ അധ്യാപകര്‍ക്ക് എട്ട്, ഒമ്ബത് ക്ലാസുകളിലെ വാര്‍ഷിക പരീക്ഷ ഡ്യൂട്ടിക്ക് ക്രമീകരണമൊരുക്കാന്‍ പൊതുവിദ്യാഭ്യാസ ഡയറക്ടറുടെ ഉത്തരവ്. എസ്.എസ്.എല്‍.സി പരീക്ഷാദിവസം തന്നെ വാര്‍ഷിക പരീക്ഷ നടത്തുന്നത് അധ്യാപകര്‍ക്ക് ദുരിതമാകുമെന്ന് കണ്ടാണ് നിര്‍ദേശം. മാര്‍ച്ച്‌ 31ന് രാവിലെ 9.45 മുതല്‍ 11.30 വരെ എസ്.എസ്.എല്‍.സി പരീക്ഷ നടക്കുന്നുണ്ട്. ഇതേ ദിവസം ഉച്ചക്കുശേഷം ഒന്നര മുതല്‍ ഒമ്ബതാം ക്ലാസിനും എട്ടാം ക്ലാസിനും വാര്‍ഷിക പരീക്ഷ നിശ്ചയിച്ചിട്ടുണ്ട്. രാവിലെ മറ്റൊരു സ്കൂളില്‍ എസ്.എസ്.എല്‍.സി പരീക്ഷ ഡ്യൂട്ടി ചെയ്യുന്ന അധ്യാപകര്‍ അതേദിവസം ഉച്ചക്കുശേഷം വാര്‍ഷിക പരീക്ഷ നടത്തിപ്പിനായി മാതൃസ്കൂളിലേക്കും ഓടണമായിരുന്നു. ഈ പ്രശ്നം പരിഹരിക്കാനാണ് ക്രമീകരണം. എസ്.എസ്.എല്‍.സി ഡ്യൂട്ടിക്ക് നിയോഗിച്ചിട്ടില്ലാത്ത അധ്യാപകരെയും എട്ട്, ഒമ്ബത് ക്ലാസുകളിലെ പരീക്ഷക്ക് ആവശ്യാനുസരണം നിയോഗിക്കാന്‍ നിര്‍ദേശിച്ചിട്ടുണ്ട്. അധികം പേരെ ഡ്യൂട്ടിക്ക് ആവശ്യമെങ്കില്‍ തൊട്ടടുത്ത എല്‍.പി/യു.പി സ്കൂളുകളിലെ അധ്യാപകരെ നിയോഗിക്കണമെന്നും പൊതുവിദ്യാഭ്യാസ ഡയറക്ടര്‍ നിര്‍ദേശം നല്‍കി.
- Fri. Sep 20th, 2024
Top Tags